Y Gwahaniaeth Rhwng Tristwch ac Iselder
Mae tristwch yn emosiwn sy’n gyffredin i bawb ac mae’n iach i ni gydnabod a pharchu ein hwyliau isel pan fo’r adegau hynny yn ein taro.
Deall pryd yr ydym angen cymorth yw’r rhan bwysig. Os mai tristwch yw eich emosiwn sylfaenol ac os ydych yn gorfod ymdrechu i fwynhau gweithgareddau o ddydd i ddydd, efallai eich bod yn dioddef o iselder.
Gwybod y Gwahaniaeth
Mae iselder yn gyflwr iechyd meddwl cymharol gyffredin. Yn wahanol i dristwch, nid yw’n emosiwn byrhoedlog. Gall wella neu waethygu ar adegau, ond yn aml bydd arnoch angen cymorth gan weithiwr proffesiynol.
Er bod amgylchiadau a phrofiadau pawb yn unigryw, mae’r canllaw cryno hwn yn egluro’r gwahaniaeth:
| Tristwch | Iselder |
| Rydych yn teimlo’n isel am ychydig ddyddiau, ond mae treulio amser gyda ffrindiau, teulu, neu’n gwneud gweithgaredd yr ydych yn ei fwynhau yn siŵr o godi eich calon. | Rydych yn teimlo’n isel am gyfnod hirach, (am bythefnos neu fwy fel rheol) ac ni all eich ffrindiau, eich teulu, na gweithgaredd yr oeddech yn arfer ei fwynhau, godi eich calon. |
| Efallai eich bod wedi colli chwant bwyd neu rydych yn cael trafferth cysgu, ond ar y cyfan mae eich arferion bwyta a chysgu yr un fath ag arfer. | Mae eich arferion bwyta yn newid (colli’r awydd am fwyd neu fwyta er mwyn cysur) a / neu mae eich arferion cysgu yn newid, felly rydych yn cysgu mwy nag arfer neu ddim yn cysgu o gwbl. |
| Rydych yn teimlo’n isel, ond rydych yn gwybod y byddwch yn teimlo’n well yn y dyfodol. | Mae eich ymdeimlad o anobaith yn gyson ac rydych yn cael trafferth gweld neu ddychmygu amser pan fydd eich teimladau yn newid. |
Beth i’w wneud nesaf?
Os ydych chi’n bersonol yn profi’r symptomau hyn neu os ydych yn adnabod arwyddion iselder yn eraill, rydym yn argymell eich bod yn cysylltu â gweithiwr proffesiynol. Gwnewch apwyntiad gyda eich Meddyg Teulu neu gwnselydd i gael diagnosis ac arweiniad ar y triniaethau gwahanol sydd ar gael. Mae sawl ffordd o geisio mynd i’r afael ag iselder, yn cynnwys ymwybyddiaeth ofalgar, myfyrio, newidiadau i’ch ffordd o fyw, meddyginiaeth ar bresgripsiwn a therapïau siarad. Mae canfod y cyfuniad cywir i chi a sicrhau bod digon o gefnogaeth o’ch cwmpas yn allweddol. Cofiwch, mae bywyd yn rhywbeth cymhleth iawn ac mae pawb angen cymorth o bryd i’w gilydd.
[Ffynhonnell: happiful.com]
Mae testun y cofnod hwn wedi’i ryddhau dan y drwydded Creative Commons BY-SA 4.0, sy’n eich caniatáu i’w ail-ddefnyddio a’i newid mewn unrhyw ffordd os ydych yn rhoi cydnabyddiaeth ar ffurf dolen i’r dudalen hon, ac yn trwyddedu eich fersiwn ddeilliadol yn yr un modd. Gweler testun y drwydded am ragor o fanylion.