Enwogion yn apelio i’r cyfryngau i newid sut y mae hunanladdiad yn cael ei drafod

Mae ffigyrau cyhoeddus megis gwleidyddion, awduron ac actorion yn apelio am newid yn y ffordd y mae pobl yn trafod hunanladdiad.

Mae’r awdur Ian Rankin, maer Llundain Sadiq Khan, y darlledwr Stephen Fry a’r DJ Lauren Laverne ymysg 130 o bobl sydd wedi llofnodi llythyr yn gofyn i’r cyfryngau arwain y ffordd wrth newid sut y mae hunanladdiad yn cael ei bortreadu.

Mae’r llythyr, sydd wedi cael ei gefnogi gan aelodau seneddol a’r sefydliadau iechyd meddwl Samaritans a Mind, yn nodi na ddylid defnyddio’r term “commit suicide” / “cyflawni hunanladdiad”, sy’n awgrymu bod hunanladdiad yn drosedd a bod meddyliau hunanladdol yn bechadurus, er nad yw wedi bod yn drosedd yn y DU ers 1961.

Yn ôl y llythyr, mae’r geiriau hyn yn gallu awgrymu bod hunanladdiad yn weithred hunanol, droseddol neu annuwiol yn hytrach na chanlyniad o boen meddyliol annioddefol, ac mae’n cynnig opsiwn arall, sef “died by suicide” / “marw drwy hunanladdiad”.

Anogir y cyfryngau i osgoi dyfalu achosion hunanladdiad, sydd yn aml yn gymhleth ac yn amlochrog. Mae’r ymgyrchwyr, sydd wedi sefydlu’r wefan ‘Talking Suicide’, hefyd yn pwysleisio’r perygl o ddefnyddio disgrifiadau manwl o hunanladdiad, sy’n gallu cael eu copïo gan eraill. Cafodd y llythyr ei greu gan ymgyrchwyr iechyd meddwl Luciana Berger a Bryony Gordon.